Bu gün şəhid Həsən Bayramov və Nurhan Abbasovun doğum günüdür.
Həsən Bəhrəm oğlu Bayramov 17 iyun 1992-ci ildə Göygöl rayonunun Sarısu kəndində anadan olub. 2000 - 2009-cu illərdə Gəncə şəhər V.Əliyev adına 12 nömrəli tam orta məktəbdə təhsil alıb. Daha sonra Gəncə Humanitar Kollecinin (indiki Gəncə Dövlət Regional Kolleci) “Maliyə işi” ixtisasına daxil olub.
2011-ci ildə həqiqi hərbi xidmətə çağırılıb. Xidməti başa vurduqdan sonra bir müddət Gəncə Regional Reklam İdarəsində dizayner kimi çalışıb, 2020-ci ilin iyul ayından isə MAXE hərbi qulluqçu kimi xidmət etməyə başlayıb.
Vətən müharibəsi zamanı Cəbrayıl, Qubadlı və Laçın uğrunda gedən döyüşlərdə böyük qəhrəmanlıq göstərib. Həsən Bəhrəm oğlu Bayramov 5 noyabr 2020-ci ildə şəhidlik zirvəsinə ucalıb.
Nurhan Əlastan oğlu Abbasov 17 iyun 1991-ci ildə Gəncədə anadan olub. 2008-ci ildə 29 nömrəli tam orta məktəbin 9-cu sinfini bitirib. 2008-2011-ci illərdə təhsilini 3 nömrəli Peşə liseyində (indiki Ticarət və Xidmət üzrə Gəncə Dövlət Peşə Təhsil Mərkəzi) davam etdirib. 2009-cu ildə həqiqi hərbi xidmətə yollanıb. Qayıtdıqdan sonra müxtəlif sahələrdə fərdi işlə məşğul olub.
Vətən müharibəsi zamanı o, yenidən ordu sıralarına çağırılıb. Cəbrayıl rayonu və Şuşa şəhəri uğrunda gedən döyüşlərdə iştirak edib. Nurhan Əlastan oğlu Abbasov 8 noyabr 2020-ci ildə Şuşanın azad olunmasından sonra Xankəndi istiqamətində gedən döyüşlərdə şəhidlik zirvəsinə ucalıb.
