Ailə Məcəlləsinə əsasən, Azərbaycan Respublikasında nikah yaşı 18 yaş müəyyən olunur. Lakin nikah yaşına çatmamış şəxslərin istəyi ilə yaşadıqları ərazinin müvafiq icra hakimiyyəti orqanı nikah yaşının 1 ildən çox olmayaraq azaldılmasına icazə verə bilər.
Bu ilin iyul ayının 1-dən etibarən isə ölkə ərazisində 17 yaşında nikaha daxil olmaq istəyənlər üçün qanun sərtləşdirilib: nikah yaşına çatmamış şəxslərə tətbiq olunan üzrlü səbəblər ləğv olunur.
Beləliklə, istisnasız olaraq rəsmi nikaha daxil olmaq istəyənlərin minimum yaş həddi 18 olaraq müəyyən edilir.
Gencexeber.az məlumat verir ki, 2024-cü ildə respublikanın 14 iqtisadi rayonu üzrə 185 nəfər 17 yaşında rəsmi nikaha daxil olub. 2023-cü ildə isə yetkinlik yaşına çatmayan 249 nəfərə icra orqanları tərəfindən evlilik üçün icazə verilib.
Gəncə-Daşkəsən iqtisadi rayonunda sözügedən məsələyə dair 22 hal qeydə alınıb.
Bu iqtisadi rayon üzrə 17 yaşında evləndirilən şəxslərin sayı ən çox Göygöldə qeydə alınıb. Sözügedən rayonda 17 hal qeydə alınıb. Gəncədə 1, Daşkəsəndə 2, Samuxda isə 2 şəxsə icra orqnları tərəfindən 17 yaşda rəsmi nikaha daxil olmağa icazə verilib.
