Gəncədə sakinlər məhəllələrinin abadlaşdırılmasını arzu edirlər. Bu haqda 2 may tarixində ATV-yə istinadən məlumat veririk.
Söhbət şəhərin birinci mikrorayonundan gedir. Burada yerləşən 14 binadan 11-nin həyəti iki il öncə abadlaşdırılıb. Lakin digər üçü baxımsız vəziyyətdə qalıb, yalnız binaların qarşısı asfaltlanıb. Sakinlərin sözlərinə görə, məsələ ilə bağlı dəfələrlə aidiyyəti quruma müraciət olunub, lakin heç bir nəticə verməyib.
“Binaların qarşısını ot basıb. Nə oturacaq var, nə də uşaqların oynaması üçün şərait. Asfalt örtüyü uzun illərdir mövcud deyil. Bir maşın keçəndə belə yolda toz qalxır.
65-70 ailənin adından rəsmi ərizə ilə müraciət etmişik. Keçən il də gəlib sahəyə baxış keçiriblər. Dedilər, ölçü götürərik, lakin ondan sonra gəlib məşğul olan yoxdur”, - deyə vətəndaşlar qeyd ediblər.
Məsələ ilə bağlı İcra Hakimiyyətindən bildirilib ki, ərazidə abadlıq işlərinin davam etdirilməsi bu ilin tədbirlər planına salınıb. Yaxın vaxtlarda 6a, 7 və 8 saylı binaların da həyətləri abadlaşdırılacaq.
