Gəncədə fəaliyyət göstərən təhsil ocağı Bakıda konfransda təmsil olunub. Bu haqda 23 aprel tarixində ATU-ya istinadən məlumat veririk.
“Azərbaycanda Rektorlar Konfransının yaradılması” (ECAR) adlı Erasmus+ layihəsi çərçivəsində hesabat konfransı baş tutub. Burada 28 ali təhsil müəssisəsi arasında Azərbaycan Texnologiya Universitetinin də nümayəndələri yer alıblar. Tədbirə, həmçinin Kiçik və Orta Biznesin İnkişafı Agentliyi, Dövlət Məşğulluq Agentliyi, Əmək Bazarı və Sosial Müdafiə Məsələləri üzrə Milli Observatoriya, Litvanın Mykolo Romero Universiteti, İsveçin Kral Texnologiya Universiteti, Belçikanın EFMD təşkilatının əməkdaşları qatılıblar.
Tədbirdə ATU-nu sosial məsələlər və ictimaiyyətlə əlaqələr üzrə prorektor Şahmar Həsənov, strateji inkişaf və rəqəmsallaşma məsələləri üzrə müşavir Mehman Kərimov, Elmi Tədqiqat Mərkəzinin direktoru Qalibə Məmmədova və layihə meneceri İlahə Qurbanova təmsil ediblər.
Görüşdə proqram çərçivəsində fəaliyyət göstərən komitələrin hesabatları dinlənilib və müzakirələr aparılıb.
Qeyd edək ki, layihə Bakı Biznes Universitetinin koordinatorluğu və Avropa Komissiyasının maliyyə dəstəyi ilə həyata keçirilir.
