Gəncədə universitetlərdən birində açılış mərasimi keçirilib. Bu haqda 25 oktyabr tarixində ATU-ya istinadən məlumat veririk.
Azərbaycan Texnologiya Universitetində (ATU) "Kapital Bank Auditoriyası" istifadəyə verilib. Otaq universitet sənaye əməkdaşlığı çərçivəsində “Kapital Bank”ın tam dəstəyi ilə qurulub. Auditoriya İqtisadiyyat kafedrası nəzdində yaradılıb.
Tədbirdə açılış lentini ATU-nun rektoru vəzifəsini müvəqqəti icra edən Yaşar Ömərov və bankın Pərakəndə satış departamentinin rəhbəri Məhəmməd İbrahimov kəsib. Auditoriya ilə tanışlıqdan sonra “Kapital Bank”ın təqdimatı edilib.
"Kapital Bank Auditoriyası" müasir tədris standartlarına cavab verir. Otaq bankın rəng və ornamentlərinə, həmçinin erqonomika qaydalarına uyğun dizayn olunub. Auditoriya 28 nəfər üçün nəzərdə tutulub. Burada ağıllı lövhə, müvafiq sayda notbuk və digər zəruri ofis avadanlıqları yerləşdirilib.
Açılış çərçivəsində ATU ilə “Kapital Bank” arasında gələcək layihələr də müzakirə edilib.
