Gəncədə 24 saylı Kitabxanada anım günü keçirilib. Bu haqda 24 aprel tarixində Mərkəzləşdirilmiş Kitabxana Sisteminə istinadən xəbər veririk.
Azərbaycanın Milli Qəhrəmanı Aqarunov Albert Aqarunoviçin anadan olmasının 55 illik yubileyinə həsr olunmuş "Azərbaycan onu sevənlərin Vətənidir" başlıqlı anım günü baş tutub. Öncə onun və digər şəhidlərin əziz xatirəsi bir dəqiqəlik sükutla yad edilib. Burada böyük kitabxanaçı I və II Qarabağ müharibəsində həmvətənlərimizin göstərdiyi qəhrəmanlıqlardan danışıb. O bildirib ki, Albert Aqarunov milliyyətcə yəhudi olduğu halda, bu torpaqda anadan olub boya-başa çatdığı üçün Azərbaycanı öz ana yurdu bilib. Vətənin müdafiəsi üçün könüllü olaraq cəbhəyə yollanıb və bir tankçı kimi böyük qəhrəmanlıqlar göstərib.
Tədbiri keçirməkdə məqsədimiz torpaqlarımızın bütövlüyü uğrunda canlarından keçən qəhrəmanlarımızı və Azərbaycanda tolerantlığa böyük önəm verildiyini təbliğ etməkdir. Sonda Albert Aqarunoviç haqqında videoçarx nümayiş edilib.
