“Yaşıl dünya naminə həmrəylik ili” çərçivəsində “Gəlin birlikdə qaçaq” şüarı altında yarış təşkil edilib. Bu haqda 28 may tarixində Gənclər və İdman Nazirliyinə istinadən xəbər veririk.
Yarışda respublikanın müxtəlif regionlarından olan 400-ə yaxın iştirakçı mübarizə aparıb. Ümumilikdə 11 kilometr məsafəni əhatə edən yürüşdə qaliblər müxtəlif kateqoriyalar üzrə müəyyən olunublar. Heydər Əliyev parkında startı verilən yürüşdə ümumi kateqoriyada kişilərdə Samir Hüseynov, qadınlarda isə Anna Yusupova mütləq çempion adını qazanıblar. 40 yaşdan yuxarı kişilər arasında Vitali Davidov, qadınların mübarizəsində isə Ziba Xuduzadə finişə birinci gəliblər. 50 yaşdan yuxarı iştirakçılar arasında Yadigar Hüseynov və Gülçöhrə Dadaşova bütün rəqiblərini qabaqlayıblar. Yaşı 60-dan çox olan idmançılar arasında Tapdıq Dadaşov və Gülnarə İsmayılova fərqləniblər.
Region iştirakçıları isə 6 kilometr məsafəyə qaçışda mübarizə aparıblar. Ümid İbrahimov və Nurtac Qarayeva rəqiblərini qabaqlayıblar. Ayxan Aslanov və Xədicə İbrahimova isə 600 metr məsafəyə qaçışda qalib olublar.
