Gəncədə fəaliyyəti dayandırılan musiqi məktəbinin dərsləri yeni ünvanda keçirilir. Bu haqda 21 may tarixində Regional Mədəniyyət İdarəsinə istinadən məlumat veririk.
Bir neçə gün öncə 2 nömrəli Uşaq Musiqi Məktəbinin sinif otaqlarının boşaldılması barədə xəbər paylaşmışdıq. Bildirilir ki, Ali Məhkəmə tərəfindən sözügedən musiqi məktəbinin istifadəsində olan 16 sinif otağının fiziki şəxsə aid olması ilə əlaqədar siniflərin boşaldılmasına dair qərar verilib. Məsələ ilə bağlı qarşı tərəfə tədris ilinin sonunadək köçürülmənin saxlanılması təklif edilsə də, həmin şəxs tərəfindən rədd edilib və 16 may tarixinədək məhkəmənin qərarının icra edilməsi bildirilib.
Bununla bağlı mayın 20-si günün birinci yarısı boşaldılan sinif otaqları məktəbin qarşısında yerləşən Sənaye və Texnologiyalar üzrə Gəncə Dövlət Peşə Təhsil Mərkəzinin və yaxınlıqdakı 42 nömrəli tam orta məktəbin inzibati binalarına köçürülüb. Məlumata əsasən, həmin günün 2-ci yarısından etibarən tədris tam bərpa edilib.
