Gəncədə sahibsiz itlərin toplanması əhalidə ciddi narazılıq və geniş rezonans doğurub.
Gencexeber.az-a daxil olan onlarla şikayətdə bildirilir ki, Mənzil Kommunal Təsərrüfatı İstehsalat Birliyinin (MKTİB) əməkdaşları şəhərin mərkəzi hissəsində sahibsiz heyvanların toplanmasını iki qrup halında həyata keçirirlər. Bu məqsədlə qoşqulu traktor və yük bölməsi olan motosikletdən istifadə olunur.
Heyvansevərlərin iddiasına görə, traktorlara yüklənən itlər Cavad xan (Avtozavod) qəsəbəsində yerləşən zibil poliqonuna aparılaraq orada buraxılır. Motosikletlə çalışan digər qrupun topladığı heyvanların aqibəti isə hələ də məlum deyil.
MKTİB-nin əməkdaşları hadisə şahidlərinə bildiriblər ki, sahibsiz heyvanlar guya “Yuva” heyvan sığınacağına aparılır. Lakin məlumdur ki, Gəncədə 2023-cü ildə yaradılan “Yuva” heyvan sığınacağı 2024-cü ilin yanvarında maddi çətinliklər səbəbilə fəaliyyətini dayandırıb.
Qeyd edək ki, redaksiyamızın dünən MKTİB-yə ünvanladığı sorğuya cavab olaraq bildirilib ki, şəhərin müxtəlif hissələrindən daxil olan çoxsaylı vətəndaş müraciətləri əsasında tədbir görülür və heyvanlara fiziki zərər yetirilmədən onlar şəhər kənarına buraxılır.
Məsələ ictimaiyyətin və hüquq müdafiəçilərinin diqqətindədir. Vətəndaşlar sahibsiz heyvanların hüquqlarına hörmətlə yanaşılmasını və bu prosesin şəffaf şəkildə aparılmasını tələb edirlər.
