Bu gün gəncəli şəhid Ayxan Musayevin doğum günüdür.
Gencexeber.az məlumat verir ki, şəhid Ayxan Mehman oğlu Musayev 22 sentyabr 2000-ci ildə Gəncədə anadan olub. 6 saylı tam orta məktəbdə təhsil alıb. Ticarət və Xidmət üzrə Dövlət Peşə Təhsil Mərkəzinin Qaz qaynaqçısı ixtisasını bitirib.
Ayxan 2019-cu ildə həqiqi hərbi xidmətə çağırılıb. "Azərbaycan-Türkiyə birgə döyüş atışlı taktiki təlim"də və "Azərbaycan uğrunda ən yaxşı bölük" adlı yarışda əldə etdiyi nailiyyətlərə görə mükafatlandırılıb.
O, 27 sentyabr 2020-ci il tarixində Vətən müharibəsinə qatılıb.
1 oktyabr 2020-ci il tarixində onurğasından və qolundan yaralanıb və yarası qismən sağaldıqdan sonra, Ayxan Musayev yenidən cəbhəyə yollanaraq könüllü sürətdə ön xətdə yazılıb.
Ayxan 8 noyabr 2020-ci ildə Şuşa şəhəri ətrafında gedən döyüşlərdə yenidən yaralanıb, ilkin tibbi yardımdan sonra Silahlı Qüvvələrin Baş Klinik Hospitalına gətirilib. Həkimlərin səyinə baxmayaraq, 20 gün koma vəziyyətində qaldıqdan sonra 28 noyabr tarixində şəhidlik zirvəsinə ucalıb. Şəhidimiz növbəti gün Gəncə şəhərinin Şəhidlər xiyabanında dəfn edilib.
Ölümündən sonra prezident tərəfindən "Vətən uğrunda", "Füzulinin azad olunmasına görə" və "Xocavəndin azad olunmasına görə" medalları və 3–cü dərəcəli "Vətənə xidmətə görə" ordeni ilə təltif edilib.
