Gəncəlilərin sevilən istirahət məkanlarından biri olan tarixi Xan bağında maraqlı, lakin bir qədər təəssüf doğuran mənzərə hökm sürür.
Gencexeber.az məlumat verir ki, bağın idman alətləri ilə təchiz olunmuş hissəsində quraşdırılmış iki böyük şahmat taxtası mövcuddur. Lakin bu taxtalar faktiki olaraq istifadəsiz vəziyyətdədir.
Səbəb isə sadədir – şahmat fiqurları yoxdur. Belə olan halda, taxtalar yalnız dekorativ məqsədə xidmət edir, vətəndaşlar isə bu gözəl imkanlardan yararlana bilmirlər. Yerli sakinlər bildirirlər ki, açıq havadakı bu cür şahmat guşələri gənclərin intellektual inkişafına, eləcə də ailəvi istirahətə töhfə verə bilərdi:
“Taxtalar çox gözəl hazırlanıb, amma uzun müddətdir fiqur yoxdur. Sadəcə baxıb keçirik, istifadə edə bilmirik” – deyə bir ziyarətçi qeyd edib.
Görünən odur ki, şəhərin mərkəzində yerləşən bu tarixi bağda belə sadə bir problemin hələ də həllini tapmaması ictimai narazılığa səbəb olur. Vətəndaşlar aidiyyəti qurumlardan sözügedən məsələ üzrə praktiki addımlar atılmasını gözləyirlər.
