Bu gün azərbaycanlı aktyor, ssenarist, səs aktyoru, Xalq artisti Şahmar Ələkbərovun anım günüdür.
Gencexeber.az xatırladır ki, o, 23 avqust 1943-cü il tarixində Gəncədə dünyaya göz açıb.
Azərbaycan İncəsənət İnstitutunun aktyorluq fakültəsində Rza Təhmasibin kursunda təhsil alıb. Hələ üçüncü kursda oxuyarkən Azərbaycan Dövlət Akademik Milli Dram Teatrına işə götürülüb. Adil İsgəndərov onu kinostudiyanın nəzdində özünün yaratdığı "Kinoaktyor" studiyasına dəvət edib.
Şahmar Ələkbərovun aktyor karyerası "Dağlarda döyüş"dən başlamışdı. Həmçinin "Mən ki gözəl deyildim", "İntizar", "Yeddi oğul istərəm", "Axırıncı aşırım", "Qızıl qaz", "Qatır Məmməd", "Firəngiz", "Arxadan vurulan zərbə", "Babək", "Əlavə iz", "Qanlı zəmi" və s. filmlərdə yaddaqalan obrazlar yaradıb. "İmtahan" (G.Əzimzadə ilə birlikdə), "Sahilsiz gecə", "Qəzəlxan" filmlərinin quruluşçu rejissorudur. O, 1989-cu ildə Azərbaycanın Xalq artisti fəxri adına layiq görülüb.
Xalq artisti, Dövlət mükafatı laureatı Şahmar Ələkbərov 1992-ci il avqustun 12-də vəfat edib.
