Gəncəli vokal ifaçısı Altun Süleymanov Üzeyir Hacıbəylinin şəxsi pianosunun müşayiəti ilə tarixi bir anı canlandırıb.
Gencexeber.az məlumat verir ki, bu hadisə dahi bəstəkarın 140 illik yubileyi çərçivəsində Bakıda yerləşən ev muzeyində baş tutub. Xalq artisti, bəstəkar və muzeyin direktoru Sərdar Fərəcovun müşayiəti ilə baş tutan bu ekspromt çıxış muzeyin qonaqları tərəfindən maraqla qarşılanıb. Orada həmin musiqi alətində Üzeyir bəyin "Sevgili canan" romansını və Tofiq Quliyevin "Sənə də qalmaz" mahnısı səsləndirilib.
Sərdar Fərəcov bu anı belə xatırladıb: “Bu pianoda Lütfiyar İmanovdan sonra illərlə heç kim ifa etməyib. Bu gün isə sən – Altun – bu səsi yenidən oyatdın. Tarix təkrarlandı”.
Qeyd edək ki, bir zamanlar Lütfiyar İmanovun səsini müşayiət etmiş bu piano hazırda Sərdar Fərəcovun xüsusi qayğısı ilə qorunur və Azərbaycan musiqi tarixinin canlı şahidlərindən biri kimi dəyərləndirilir.
