Tovuz rayonunda 26 yaşlı üç uşaq anası Lamiyə Səməd qızı Cəlilovanın itkin düşdüyü bildirilir.
Gencexeber.az məlumat verir ki, Lamiyə Cəlilova avqustun 6-da yaşadığı evdən çıxıb və bir daha geri qayıtmayıb.
Məlumata görə, qadın bir müddət əvvəl Tovuz rayonunun Qazıqulu kəndində yerləşən ata evinə gəlib. O, sonuncu dəfə məhz burada görülüb. Bundan sonra onunla əlaqə saxlamaq mümkün olmayıb.
Yaxınlarının sözlərinə görə, Lamiyənin itkin düşməsi ilə bağlı dərhal polisə məlumat verilib. Onun üzərində şəxsiyyət vəsiqəsinin olduğu ehtimal edilir. Qadının evdən uşaqları yatarkən sakit şəkildə çıxdığı bildirilir.
Ailə üzvlərinin sözlərinə görə, Lamiyənin həyat yoldaşı ilə müəyyən narazılıqları olsa da, ailənin digər üzvləri ilə ciddi problemi olmayıb. Onun son günlərdə emosional vəziyyətinin də yaxşı olmadığı bildirilib.
Hazırda Lamiyə Cəlilovanın tapılması istiqamətində Tovuz Rayon Polis Şöbəsi tərəfindən axtarış tədbirləri davam etdirilir.
Ailə üzvləri Lamiyə Cəlilovanın yeri barədə məlumatı olan şəxslərdən aidiyyəti qurumlara məlumat vermələrini xahiş edirlər.
