Xəbər verdiyimiz kimi, "C130" tipli hərbi yük təyyarəsi Gəncədən Türkiyəyə qayıdarkən Gürcüstan sərhədində qəzaya uğrayıb.
Gencexeber.az məlumat verir ki, hava gəmisinin göyərtəsində olan 20 hərbçi arasında Baş texnik Emre Sayın da olub. Türkiyədə şəhid elan edilən qardaş ölkənin hərbçisi son gününü Gəncədə keçirib.
Bu barədə məlumatı Gəncə şəhər sakini Vüqar Əliyev redaksiyamıza bildirib.
Onun sözlərinə görə, Emre Sayın ilk dəfə idi ki, Gəncəyə səfər edirdi. Qısa tanışlıqdan sonra o, şəhəri gəzmək və Türkiyədə yaşayan yaxınları üçün alış-veriş etmək istədiyini bildirib.
Bu səbəbdən Vüqar Əliyev və dostları qonağı şəhərlə tanış edib, onu Göygölə və Hacıkəndə də aparıblar. Həmyerlilərimiz türk hərbçisinə süfrə açıblar: "Rəhmətlik üçün süfrə açdıq. Qonaqpərvərliyə görə bizə dərin minnətdarlığını bildirib, Gəncənin sakit və gözəl şəhər olduğunu dedi. Çox qürurlandıq. Sonra xəbərləri görüb sarsıntı keçirdik. Gəncə son xatirəsi oldu…"
Növbəti gün Emre Sayın Gəncədən Türkiyəyə yola düşəcək aviareysə yola salınıb.
Əfsuslar olsun ki, həmin səfər Emre Sayının son uçuşu oldu.
Allah rəhmət etsin!
