Heydər Əliyev adına Mədəniyyət və İstirahət parkı müasir tələblərə uyğun olaraq abadlaşdırılsa da, onun ən mühüm hissələrindən biri olan uşaqlar üçün guşəsi bu diqqətdən kənarda qalıb.
Gencexeber.az məlumat verir ki, Goranboyun Heydər Əliyev adına Mədəniyyət və İstirahət parkında 2019-cu ildə başa çatdırılmış yenidənqurma işlərindən sonra ərazi sakinlərin, eləcə də qonaqların istirahət üçün ən çox üz tutduğu məkanlardan birinə çevrilsə də, uşaq əyləncə guşəsinin indiki vəziyyəti ciddi narahatlıq doğurur. Belə ki, orada yaşıllıq sahələri genişləndirilib, gəzinti yolları təmir olunub, oturacaqlar və işıqlandırma sistemləri yenilənib.
Sakinlər bildiriblər ki, parkda yerləşən uşaq əyləncə attraksionları köhnəlib, bəziləri qırılıb, bəziləri isə təhlükəli vəziyyətdədir. Müasir oyun qurğularının olmaması, təmir edilməyən yelləncəklər və sürüşkənlər valideynlərin narahatlığına səbəb olur.
Şikayətçilər ümid edirlər ki, parkın ümumi vəziyyəti kimi uşaq əyləncə sahəsi də tezliklə bərpa ediləcək, Goranboyun yetişməkdə olan sakinləri üçün təhlükəsiz, müasir istirahət imkanları yaradılacaq.
