Daşkəsəndə itkin düşən 73 yaşlı kişinin axtarışları yekunlaşıb.
Gencexeber.az-a bu barədə Daxili İşlər Nazirliyinin (DİN) mətbuat xidmətinin Gəncə regional qrupunun baş inspektoru Eşqin Qasımov bildirib.
Onun sözlərinə görə, meşədə itkin düşən Kəlbəcər rayon sakini 1952-ci il təvəllüdlü Kamil Abdullayev polis əməkdaşları tərəfindən tapılaraq ailəsinə təhvil verilib.
Onun həyatı üçün təhlükə yoxdur.
14:15
Gencexeber.az-a Fövqəladə Hallar Nazirliyi (FHN) tərəfindən verilən məlumata əsasən, axtarışlara qurumun Gəncə Regional Mərkəzinin xilasediciləri çağırış üzrə cəlb olunub.
Hazırda vətəndaşın itkin düşdüyü ehtimal olunan istiqamətlər üzrə mürəkkəb relyefli dağlıq-meşəlik ərazilərdə axtarış-xilasetmə tədbirləri həyata keçirilir.
Qeyd edək ki, Kamil Abdullayev 44 günlük Vətən müharibəsində şəhid olan Şəhriyar Abdullayevin atasıdır.
10:32
Daşkəsəndə itkin düşən şəhid atası ilə bağlı rəsmi açıqlama verilib.
Gencexeber.az-a Daxili İşlər Nazirliyinin mətbuat xidmətinin Gəncə regional qrupundan bildirilib ki, Daşkəsən rayonunda meşədə itkin düşən şəhid atasının tapılması istiqamətində axtarışlar aparılır:
“Hazırda Daşkəsən rayon polis şöbəsinin əməkdaşları tərəfindən şəxsin yerinin müəyyən olunması istiqamətində zəruri axtarış tədbirləri həyata keçirilir. Axtarış tədbirlərinin nəticəsi barəsinə əlavə məlumat veriləcək".
09:56
Daşkəsən rayon Bayan kəndində məskunlaşmış Kəlbəcər rayonundan olan məcburi köçkün, 1952-ci il təvəllüdlü Abdullayev Kamil Mahmud oğlu itkin düşüb.
Gencexeber.az-ın məlumatına əsasən, o, dünən saat 17 radələrində kənd ərazisindəki meşəyə bitki yığmağa gedib və evə qayıtmayıb.
Hazırda onun axtarışları davam etdirilir.
Qeyd edək ki, Kamil Abdullayev 44 günlük Vətən müharibəsində şəhid olan Şəhriyar Abdullayevin atasıdır.
