Xəbər verdiyimiz kimi, Yeni Gəncə yaşayış massivində yerləşən 9 mərtəbəli binanın liftinin fəaliyyəti dayandırılmışdı.
Məsələ ilə bağlı Gəncə şəhər Mənzil Kommunal Təsərrüfatı İstehsalat Birliyinin (MKTİB) mətbuat xidmətindən Gencexeber.az-a açıqlama verilib.
Bildirilib ki, Yeni Gəncə qəsəbəsi, bina 21, blok 1 və 2-nin sakinlərinin liftlərinin işləməməsilə bağlı səsləndirdikləri iddialar həqiqəti əks etdirmir:
“Adıçəkilən ünvanda yaşayan sakinlər artıq uzun müddətdir ki, işlətdikləri liftin xidmət haqqını ödəməkdən boyun qaçırırlar. Bununla da Yeni Gəncə qəsəbəsi, bina 21, blok 1 və 2-nin sakinlərinin “Gəncə Lift Servis MMC”ə ümumilikdə 1000 manatdan çox borcu formalaşıb. Hazırda həmin liftlərin işləməsi üçün təmir işləri aparılmalıdır və təmir işləri də sakinlərin ödənilən xidmət haqqına uyğun görülür”.
Qeyd olunub ki, bina sakinlərinin səsləndirdikləri vəfat etmiş şəxslərin adına borc formalaşması iddiasına gəlincə, qanunvericiliyin tələblərinə uyğun olaraq, ünvanda yaşayan sakinlər vəfat etmiş ailə üzvləri haqqında sənədi aidiyyəti üzrə təqdim etdikdən sonra ölmüş şəxsin adı xidmət siyahısından çıxarılır:
“Amma həmin binanın sakinlərindən vəfat edən yaxınları haqqında Gəncə şəhər MKTİB-ə elə bir sənəd təqdim edilməyib. Buna görə də, vəfat edən şəxsin adına borc yazılıb.
Nazirlər Kabinetinin qərarına əsasən, hazırda lift xidmət haqqı ünvanda yaşayan hər adama görə aylıq 20 qəpik təşkil edir. Qeyd edək ki, Gəncə şəhərində ümumilikdə 75 binada 201 lift xidmət göstərir. Şəhərimizdə çoxmənzilli yaşayış binalarının lift təsərrüfatının yenilənməsi məqsədilə ölkə prezidentinin sərəncamlarına uyğun olaraq Gəncə şəhərində mərhələli şəkildə, 2005-ci ildə 36 ədəd, 2010-cu ildə 20 ədəd, 2013-cü ildə 70 ədəd və nəhayət 2021-ci ildə 93 ədəd yeni lift gətirilərək öz ünvanları üzrə quraşdırılmışdır. Bu il isə prezidentin sərəncamına uyğun olaraq 10 yeni liftin quraşdırılması nəzərdə tutulur”.
