Summativ qiymətləndirmənin nəticələri, eləcə də yarımillik və illik qiymətlərin hesablanması ilə razılaşmayan təhsilalanların və onların valideynlərinin şikayət etmək hüququ var.
Belə ki, summativ qiymətləndirmələrin nəticələri, yaxud yarımillik və illik qiymətlərin hesablanması ilə razılaşmayan təhsilalanlar, onların valideynləri və ya digər qanuni nümayəndələri qiymətin yazıldığı tarixdən 30 gün müddətində qiymətləndirmənin nəticələrinin araşdırılması üçün təhsil aldıqları ümumi təhsil müəssisəsinin rəhbərinə yazılı şəkildə şikayət edə bilərlər.
Şikayətdə göstərilən halların, o cümlədən sualın tərtibatında və ya balların hesablanmasında yol verilmiş səhvlərin öz təsdiqini tapdığı halda, ümumi təhsil müəssisəsinin rəhbəri tərəfindən iki qərardan biri qəbul edilir.
Bunlar:
- qiymətləndirmənin nəticələrinə təsir göstərmiş hallar nəzərə alınaraq yenidən hesablanmanın aparılması və nəticələrə dəyişiklik edilməsi;
- qiymətləndirmənin nəticələrinin ləğv edilməsi və təhsilalanın biliyinin yenidən qiymətləndirilməsinin təşkil edilməsi.
Təhsilalanın biliyinin yenidən qiymətləndirilməsi müəyyən edilmiş qaydalara uyğun həyata keçirilir.
Əgər şikayətdə göstərilən hallar öz təsdiqini tapmazsa, təhsilalana, onun valideyninə və ya digər qanuni nümayəndəsinə bu barədə əsaslandırılmış cavab göndərilir.
Şikayətə baxılmasının nəticəsi ilə razılaşmayan təhsilalanların, onların valideynlərinin və ya digər qanuni nümayəndələrinin müraciətlərinə isə ümumi təhsil müəssisəsinin tabeliyindən asılı olaraq yerli təhsili idarəetmə orqanları və ya Azərbaycan Respublikasının Elm və Təhsil Nazirliyi tərəfindən baxılır.
Bu mərhələdə də şikayətdə göstərilən hallar öz təsdiqini taparsa, ümumi təhsil müəssisəsinə qiymətləndirmə nəticələrinin yenidən hesablanması və dəyişdirilməsi və ya nəticələrin ləğv edilərək təhsilalanın biliyinin yenidən qiymətləndirilməsinin təşkili barədə tapşırıq verilir.
Şikayətdə göstərilən hallar öz təsdiqini tapmadıqda isə təhsilalana, onun valideyninə və ya digər qanuni nümayəndəsinə bu barədə əsaslandırılmış cavab göndərilir.
Mənbə: azedu.az
