Gəncədə Heydər Əliyev Park-Kompleksi ərazisində yerləşən süni göl yenidən istifadəyə verilib.
Gencexeber.az məlumat verir ki, Mənzil-Kommunal Təsərrüfatı İstehsalat Birliyi tərəfindən gölün ətrafında və məcrasında genişmiqyaslı təmizlik işləri aparılıb. Ərazidə toplanan plastik butulkalar, sellofan torbalar və digər məişət tullantıları yığılaraq daşınıb.
Bundan başqa, ötən həftənin ortalarından etibarən gölə suyun buraxılmasına başlanılıb. Hazırda proses tam yekunlaşıb və süni göl yenidən su ilə doldurulub.
Qeyd edək ki, 6 hektar əraziyə malik süni göl 2023-cü ilin yaz aylarında qonşu rayonlardan gələn sel suları nəticəsində daşaraq ətraf yaşayış sahələri üçün təhlükə yaratmışdı. Dibi lil və palçıqla dolan gölün suyu həmin vaxt aidiyyəti qurumlar tərəfindən tamamilə çəkilmişdi.
2024-cü ildə Azərbaycan Dövlət Su Ehtiyatları Agentliyinin tabeliyində fəaliyyət göstərən Regional Su Meliorasiya Xidmətinin sifarişi əsasında ərazidə təmir-bərpa işləri həyata keçirilib. İşlər çərçivəsində 380 metr uzunluğunda suötürücü boru çəkilib, həmçinin gölün yamacları beton tavalarla üzlənib. Həmin ilin dekabr ayında isə obyektin təhvil verilməsi gözlənilirdi. Eyni zamanda əraziyə müxtəlif balıq növlərinin buraxılmasının planlaşdırıldığı bildirilmişdi.
#gence #gencexeberaz #gəncə #genceliler #gəncəm #xeber #park
