Xəbər verdiyimiz kimi, 7 iyun 2026-cı il tarixində I ixtisas qrupu üzrə keçirilmiş qəbul imtahanının nəticələrinə əsasən, Gəncə şəhər Fizika, Riyaziyyat və İnformatika Təmayüllü Liseyin şagirdi Əli Mehdiyev maksimum bal toplayıb.
Uğuru haqqında danışan Əli deyib ki, əlindən gələni edib və yekunda zəhmətinin nəticəsini görüb.
"İmtahandan əvvəl 400 bal toplayacağımı gözləmirdim. Ancaq imtahandan çıxıb sualları yoxlayandan sonra belə bir ehtimal yarandı. İxtisas seçimini isə hələ dəqiqləşdirməmişəm".
Nəticələr çıxanda və maksimum nəticə əldə etdiyimi görəndə əvvəlcə inanmadım:
"Çünki o qədər də gözləmirdim. Amma sonra çox sevindim, ailəmlə birlikdə bu sevinci yaşadıq. Mən liseydə oxuduğum üçün repetitor yanında olmamışam. Altıncı sinifdən bəri liseydə oxuyuram və elə oranın dərsləri ilə də, şükür Allaha, özümü inkişaf etdirmişəm. Hazırlıq dövründə sosial şəbəkələrdən də tamamilə uzaqlaşmamışdım, boş vaxtım olduqca, dincəlmək məqsədilə istifadə edirdim.
Bəziləri düşünür ki, yüksək bal toplayan, savadlı şagirdlər telefondan və sosial şəbəkələrdən tam uzaqdırlar. Mən bununla tam razı deyiləm. Əsas məsələ nizam-intizamdır. Çünki "lap hər şeyi atım, dünyadan xəbərim olmasın, kor-koranə yaşayım" – belə də olmamalıdır.
Abituriyentlərə tövsiyəm odur ki, ilk növbədə özlərinə güvənsinlər, özlərinə inansınlar. Bir gün bu əziyyətin mütləq qarşılığını görəcəklər. Hansı ali təhsil müəssisəsində oxuyacağıma gəlincə, bunu hələ evdəkilərlə məsləhətləşib, ondan sonra qərar verəcəyəm".
Mənbə: Azedu.аz
