Gəncədə itlərin güllələnməsi məsələsi sakinləri narahat edir. Bu haqda 5 dekabr tarixində Oxu.az-a istinadən məlumat veririk.
Ötən gün sosial şəbəkələrdə bir nəfərin şəhər ərazisindəki sahibsiz itləri güllələyərək öldürməsi barədə videolar paylaşılıb. Görüntülər müzakirələrə səbəb olub. Bildirilib ki, orta yaşlı kişi ov tüfəngi ilə küçə itlərinə atəş açıb, daha sonra onların cəsədlərini avtomobilə qoyaraq aparıb.
Videoda həmin şəxsdən bunun səbəbi soruşulub. O isə qarğalara atəş açdığını bildirib.
Məsələ ilə bağlı Daxili İşlər Nazirliyindən açıqlama verilib. Qeyd olunub ki, həmin görüntülərlə bağlı Gəncə şəhər Baş Polis İdarəsi məlumatlıdır və hazırda araşdırmalar aparılır.
Sakinlər göstərişin İcra Hakimiyyəti tərəfindən verildiyini bildiriblər. Lakin qurum bu iddianı təkzib edib.
