Gəncədə növbəti müəssisədə yoxlamalar keçirilib. Bu haqda 25 oktyabr tarixində AQTA-ya istinadən məlumat veririk.
Qida Təhlükəsizliyi Agentliyinin əməkdaşları monitorinq tədbirlərini davam etdirirlər. Onlar Nəriman Nərimanov küçəsi, ev 360A ünvanında fəaliyyət göstərən, fiziki şəxs Xatirə Şərif qızı Ələsgərovaya məxsus çörək istehsalı müəssisəsinə baxış keçiriblər.
Nəticədə sexdə qida təhlükəsizliyi sahəsində normativ hüquqi aktların tələblərinin pozulduğu üzə çıxıb. Baxış zamanı çörək istehsalı müəssisəsinin sanitar-texniki və sanitar-gigiyenik vəziyyətinin qənaətbəxş olmadığı, istifadə olunan alət, avadanlıq və ləvazimatların müvafiq şəraitdə saxlanılıb dezinfeksiya edilmədiyi, işçi heyətin xüsusi geyim vasitələri ilə təmin olunmadığı və digər nöqsanlar aşkarlanıb.
Faktla bağlı sahibkar barəsində inzibati protokol tərtib edilib. Həmçinin müəssisənin fəaliyyəti nöqsanlar aradan qaldırılanadək məhdudlaşdırılıb, icrası məcburi göstərişlər verilib. Araşdırmalar davam etdirilir.
