Goranboy şəhərində qəzalı vəziyyətə düşən yaşayış binalarının sökülməsi davam etdirilir.
Gencexeber.az-ın əldə etdiyi məlumata görə, şəhərin Cəfər Cabbarlı küçəsi 4 ünvanında yerləşən qəzalı yaşayış binalarının sökülməsi mərhələli şəkildə həyata keçirilir. Ərazidə yerləşən 16 mənzilli, 3 bloklu ikimərtəbəli yaşayış binasının söküntüsü artıq tam başa çatdırılıb.
Hazırda isə həmin ərazidə yerləşən 60 mənzilli, 6 bloklu beşmərtəbəli yaşayış binasında söküntü işləri aparılır.
Qeyd edək ki, ötən ilin noyabr ayında beşmərtəbəli yaşayış binasının birinci mərtəbəsində tavanın çökməsi nəticəsində iki nəfər xəsarət almışdı. Hadisədən sonra bina qəzalı elan olunaraq sakinlər təxliyə edilmişdi.
Məlumata görə, dövlət qurumları tərəfindən sakinlərin kirayə xərclərinin qarşılanması təmin olunub. Sökülən binaların yerində isə yeni yaşayış kompleksinin inşası nəzərdə tutulur. Layihə çərçivəsində sakinlərin sözügedən kompleksdə yeni mənzillərlə təmin ediləcəyi bildirilir.
