Salyan rayonunda baş verən yol qəzası bir nəfərin ölümü ilə nəticələnib.
Qəza martın 11-də Ələt–Astara magistralının Salyan rayonunun Şorsulu kəndi ərazisindən keçən hissəsində baş verib. 19 yaşlı Goranboy rayon sakini Nahid Orucsoy idarə etdiyi "Kia Forte" markalı avtomobillə hərəkətdə olarkən idarəetməni itirib və nəqliyyat vasitəsi aşaraq yoldan çıxıb.
Qəza nəticəsində avtomobildə sərnişin olan 32 yaşlı Namaz Babayev aldığı xəsarətlərdən hadisə yerində ölüb. Sürücü isə müxtəlif dərəcəli bədən xəsarətləri ilə xəstəxanaya yerləşdirilib.
DİN-in Mətbuat Xidmətinin regional qrupundan bildirilib ki, qəzadan sonra avtomobilə baxış keçirilərkən qara polietilen torbanın içərisində narkotik vasitə hesab edilən marixuana aşkar olunaraq maddi sübut kimi götürülüb.
Sürücü izahatında bildirib ki, onlar bir gün əvvəl Bakı şəhərindən kirayə götürdüyü avtomobillə Biləsuvar rayonuna gediblər. Onun sözlərinə görə, qohumu Namaz Babayev həmin ərazidə bir ünvandan qara polietilen torba götürərək avtomobilə qayıdıb.
Bakı istiqamətində geri qayıdarkən yolda sayrışan işıqları görüb polis əməkdaşları ola biləcəyini düşündüyü üçün avtomobili saxlamaq istəyib. Lakin N.Babayev buna etiraz edib, əlindəki torbanı pəncərədən atıb və sürücünü bıçaqla hədələyərək sürəti artırmasını tələb edib.
Bundan sonra sürücü yüksək sürətlə hərəkətini davam etdirib və müəyyən məsafə qət etdikdən sonra Salyan rayonu ərazisində idarəetməni itirərək avtomobili aşırıb.
Faktla bağlı cinayət işi başlanılıb, araşdırma davam etdirilir.
