İran İslam Respublikasının prezidenti Məsud Pezeşkian “Tehran Tayms”a eksklüziv müsahibəsində prezidentliyə qədərki həyat tərzindən və üzərinə düşən gərgin vəzifələrdən danışıb.
Modern.аz xəbər verir ki, Məsud Pezeşkian “Tehran Tayms”ın müxbiri ilə Azərbaycan səfərindən qayıdarkən təyyarədə söhbətləşib.
Pezeşkian idman vərdişlərindən tutmuş İranın xarici siyasətdəki mövqeyinə qədər bir çox mövzuda açıqlamalar verib.
Məlum olub ki, aprelin 28-də İran nümayəndə heyətilə Bakıya rəsmi səfər edən Pezeşkian əslində Azərbaycanda 2 gün qalmağı planlaşdırıb. Prezidentin səfər proqramına birinci gün Bakıda, ikinci gün isə dahi şair Nizami Gəncəvinin məzarının yerləşdiyi Gəncə şəhərində olmaq daxil imiş.
Lakin həmin ərəfədə İranın cənubundakı Bəndər Abbas limanında güclü yanğının baş verməsi və çoxsaylı insan tələfatı Məsud Pezeşkianın Gəncəyə getmək planını pozub və o, səfərini bir gün tez başa vurmağa məcbur olub.
