Tovuz rayonu, Əlibəyli kəndində Koroğlu dağının yamacında 15 min manatlıq heyvan oğurlayan şəxsə hökm oxunub.
Qaynarinfo.аz xəbər verir ki, 1991-ci il təvəllüdlü Əli Vəliyev (ad-soyad şərtidir) barəsində Cinayət Məcəlləsinin 177.2.4-cü maddəsi ilə açılan cinayət işinə məhkəmədə baxılıb.
Əli Vəliyev ümumi dəyəri 15428 manat olan 13 baş heyvanı oğurlayıb. O, heyvanları Qazax rayonu ərazisində yerləşən çöllük sahəyə aparıb və həmin ərazidə saxlayıb.
Təxminən bir həftə sonra isə heyvanları Qazax rayonu ərazisində yerləşən Uşaq poliklinikasının həyətinə aparıb. Zərərçəkmişin şikayəti əsasında heyvanlar poliklinkanın həyətində tapılaraq sahibinə təhvil verilib.
Məlum olub ki, təqsirləndirilən şəxs oğurluğa görə 2018-ci ildə də 5 il 6 ay müddətinə məhkum edilib. O, zərərçəkmiş şəxsə məxsus heyvanların qiymətinin təxminən 15000 manat olduğunu bildiyini, onları satmaq və ya kəsmək fürsətinin olduğunu, lakin saxlamaq məqsədilə apardığını bildirib.
Məhkəmənin hökmü ilə Əli Vəliyev 2 il 3 ay 14 gün azadlıqdan məhrumetmə cəzasına məhkum edilib. Təqsirləndirilən şəxs cəzasını ciddi rejimli cəzaçəkmə müəssisəsində çəkəcək.
