Gəncədə baş verən qətlin təfərrüatları məlum olub. Bu haqda 29 iyun tarixində Xəzər Xəbərə istinadən məlumat veririk.
Ötən gün 19 yaşlı Samir Hüseynovun 35 yaşlı kişini bıçaqlaması barədə məlumat vermişdik. Hadisə şəhərin Nizami Gəncəvi prospektində yerləşən kafedə baş verib.
Zəngilan rayon sakini olan Hüseynovun kafeni işlədən Şəmkir rayon sakini Kamil Cəfərovla mübahisəsi yaranıb. Bu vaxt gənc qarşısındakına bir neçə bıçaq zərbəsi endirib. Nəticədə kafenin sahibi hadisə yerində ölüb.
Universitetlərdən birinin tələbəsi olan Samir Hüseynovun kafedə müvəqqəti günəmuzd işlədiyi bildirilir. İlkin ehtimala əsasən, mübahisə tərəflərdən birinin söyüş söyməsi nəticəsində qızışıb. Hadisə ilə əlaqədar kafenin fəaliyyəti dayandırılıb.
Samir Hüseynov polis tərəfindən saxlanılaraq istintaqa təhvil verilib. Faktla bağlı Gəncə Şəhər Prokurorluğunda cinayət işi açılıb, araşdırmalar davam etdirilir.
