Gəncədə mərkəz direktoru beynəlxalq tədbirdə iştirak edib. Bu haqda Gencexeber.az-a 10 oktyabr tarixində məlumat daxil olub.
Kırıkkale Universitetinin İslam Elmləri Fakültəsi, İslam Ölkələri Tətbiq və Araşdırma Mərkəzi, Azərbaycan İlahiyyat İnstitutu, İndoneziya Kalicaga Yogyakarta Dövlət İslam Universiteti və Azərbaycan Mənəvi Dəyərlərin Təbliği Fondunun birgə təşkilatçılığı ilə Türkiyənin Kırıkkale şəhərində simpozium təşkil olunub. Burada 14 ölkədən 100-dən artıq alim iştirak edib.
Azərbaycandan tədbirə qatılanlar arasında AMEA Gəncə bölməsi Nizami Gəncəvi Mərkəzinin direktoru Əlimuxtar Muxtarov da olub. Alim məruzəsində Nizami Gəncəvinin əsərlərində təbliğ və təsvir edilən tolerantlığın, birgəyaşayışın, multikultural ənənələrin Azərbaycan xalqının tarixi keçmişindən gəldiyini və bu ideyaların bu gün də cəmiyyətimizdə mehribanlıqla birgə yaşayan müxtəlif xalqların bir həyat tərzi olduğunu vurğulayıb. Muxtarov simpoziumda Nizami Gəncəvi ilə bağlı həyata keçirilən tədbirlərdən söz açıb. Bundan başqa, o, dahi mütəfəkkirin həyat və yaradıcılığı ilə bağlı ölkəmizdə nəşr edilən bəzi kitabların elektron versiyalarının qonaqlar üçün əlçatanlığını təmin edib.
Qeyd edək ki, beynəlxalq tədbirə Azərbaycandan, həmçinin Dini Qurumlarla İş üzrə Dövlət Komitəsi sədrinin birinci müavini Səyyad Salahlı, Azərbaycan İlahiyyat İnstitutunun rektoru Aqil Şirinov və prorektoru Mirniyaz Mürsəlov, Mənəvi Dəyərlərin Təbliği Fondunun icraçı direktoru Mehman İsmayılov, Mənəvi dəyərlərin Təbliği Fondunun İcraçı direktorunun müavini Hatəm Gülməmmədov, Azərbaycan İlahiyyat İnstitutunun Xarici Əlaqələr Üzrə Baş mütəxəssisi Şahin Ələsgərov, Mənəvi Dəyərlərin Təbliği Fondu "Mənəvi Dəyərlərin təbliği şöbəsi"nin baş mütəxəssisi Aynur Süleymanlı qatılıblar.
