Gəncədə gürcü ədibin xatirəsi əbədiləşdirilib. Bu haqda 6 dekabr tarixində İcra Hakimiyyətinə istinadən məlumat veririk.
İcra Hakimiyyətinin, Mədəniyyət nazirliyinin və Gürcüstanın Gəncədəki Baş Konsulluğunun təşkilatçılığı ilə Cavad xan dəftərxana muzeyinin önündə görkəmli gürcü yazıçısı Nikoloz Barataşvilinin xatirə lövhəsinin açılış mərasimi keçirilib. Burada icra başçısı Niyazi Bayramov, Gürcüstanın Azərbaycandakı fövqəladə və səlahiyyətli səfiri Zurab Pataradze, Türkiyənin Gəncədəki Baş konsulu Recep Öztop, Mədəniyyət nazirinin müavini Murad Hüseynov, millət vəkilləri Pərvin Kərimzadə, Müşfiq Cəfərov, Arzu Nağıyev, YAP Gəncə Şəhər Təşkilatının sədri Bayram Aslanov, Gürcüstan Yazıçılar Evinin direktoru, deputat Ketevan Dumbadze, İcra Hakimiyyəti başçısı Aparatının məsul əməkdaşları, idarə, müəssisə, təşkilat rəhbərləri və şəhər ictimaiyyəti iştirak ediblər.
Şəhər rəhbərliyi şair Barataşvilinin Gəncədə yaşayıb-yaratdığını bildirib. Ədibin 205 illik yubileyi münasibətilə vaxtilə onun çalışdığı Cavadxan dəftərxana muzeyinin binasının fasadına xatirə lövhəsi vurulub. Bildirilib ki, xatirə lövhəsinin vurulmasında məqsəd şairin adının əbədiləşdirilməsidir.
Zurab Pataradze bu addıma görə təşəkkür edib. Qonaqlar Barataşvilinin həyat və yaradıcılığından danışıblar.
Çıxışlardan sonra xatirə lövhəsinin üzərindəki ağ örpək götürülüb, önünə tər güllər düzülüb. Rəsmi hissədən sonra “Xəmsə” Uşaq Rəqs Ansamblının solisti Məryəm Əlizadənin, 1 nömrəli Musiqi Məktəbinin müəllimi Amin Bayramovun və Qax rayonunda fəaliyyət göstərən “Şvitkatso” Gürcü Xalq Xorunun, o cümlədən “İmedi” rəqs kollektivinin çıxışları izlənilib.
Sonda iştirakçılara Nikoloz Barataşvilinin kitabları hədiyyə olunub və təşəkkürnamələr təqdim edilib.
