Kənd təsərrüfatı naziri Gəncəyə səfər edib. Bu haqda 15 iyul tarixində nazirliyə istinadən məlumat veririk.
Kənd təsərrüfatı naziri Məcnun Məmmədov Nizami yurdunda fəaliyyət göstərən elmi-tədqiqat institutunun fəaliyyəti ilə tanış olub. O, bölgəyə səfər çərçivəsində Bitki Mühafizəsi və Texniki Bitkilər Elmi-Tədqiqat İnstitutuna, Heyvandarlıq Elmi-Tədqiqat İnstitutuna və Respublika Süni Mayalanma Mərkəzinə baş çəkib, institutların fəaliyyəti ilə maraqlanıb, əməkdaşlarla görüşüb.
Burada institutların elmi-tədqiqat istiqamətləri, elmi-tədqiqat işlərinin icra vəziyyəti, institutların maddi-texniki bazasının təkmilləşdirilməsi, laboratoriyaların fəaliyyəti barədə fikir mübadiləsi aparılıb, tədqiqatların nəticələrinin təcrübədə tətbiqi məsələləri müzakirə olunub.
Bildirilib ki, müəssisələrdə aparılan tədqiqatlar, mövzu seçimləri aqrar sahədə dünyada mövcud olan trendlərə uyğun olmalı, institutlar öz elmi fəaliyyətlərini günün tələblərinə uyğun qurmalı, elmi müəssisələrlə özəl sektor arasında əməkdaşlıq genişləndirilməlidir.
