“Nədən oldu” mahnısı 1950-ci illərdə ərsəyə gəlib. Mahnının sözləri Bəxtiyar Vahabzadəyə, musiqisi isə Şəfiqə Axundovaya məxsusdur. Bu ifanın yaranmasının Gəncə ilə bağlı bir tarixçəsi var.
Gencexeber.az məlumat verir ki, 1958-ci ildə Gəncə Dövlət Dram teatrının səhnəsində Bəxtiyar Vahabzadənin “Hicran” əsərinin premyerası baş tutur. Tamaşanın musiqi tərtibatı Şəfiqə Axundovaya həvalə olunur. Bir müddət sonra tamaşaya maraq azalır və bu zaman Axundova tamaşada səslənən bir ifanı yenidən gündəmə gətirməyi qərara alır. Bu mahnı məhz “Nədən oldu” nəğməsi idi.
1960-cı ilin əvvəllərində Şəfiqə Axundova mahnını müğənni Sara Qədimovaya təqdim edir. İfaçı mahnını bəyənir və öz repertuarına salır. 7 fevral 1961-ci ildə “Nədən oldu” mahnısını müstəqil şəkildə ilk dəfə Sara Qədimova ifa edir. Bundan sonra ifa məşhurlaşır. Daha sonra mahnını Elmira Rəhimova və Şövkət Ələkbərova lentə yazdırırlar. Həmin ifalar Qızıl Fondda saxlanılır. Bu illərdə mahnıya ilk dəfə kişi ifaçı – Əbülfət Əliyev də müraciət edir.
Mahnı daha çox müğənni Rübabə Muradovanın ifasında məşhurlaşır. Bu ifaçıdan başqa da Azərbaycanın bir çox müğənniləri mahnıya müraciət ediblər.
“Nədən oldu” mahnısı 1980-ci illərdə türkiyəli müğənni İbrahim Tatlısəs tərəfindən ifa edilir və mahnı Türkiyədə də məşhurlaşır. Lakin Tatlısəs bu mahnını daim anonim adı ilə ifa edir. İbrahim Tatlısəsin Bakı səfərlərinin birində Şəfiqə Axundova ona mahnının musiqi müəllifinin özü, sözlərin müəllifinin isə Bəxtiyar Vahabzadə olduğunu söyləyir. Bir müddət sonra Tatlısəs mahnının kimə aid olduğunu şifahi şəkildə təsdiq edir. Lakin Türkiyədə mahnı yenə də anonim adı ilə ifa olunmağa davam edir.
