Gəncədən olan nümayəndələr qurultayda iştirak ediblər. Bu haqda 23 oktyabr tarixində İcra Hakimiyyətinə istinadən xəbər veririk.
Ümummilli liderin yubileyinə və ilk Qadın Qurultayının 25 illiyinə həsr olunan Azərbaycan Qadınlarının VI Qurultayı baş tutub. Tədbirdən öncə iştirakçılar Fəxri xiyabanı ziyarət edib, Heydər Əliyevin, eləcə də akademik Zərifə Əliyevanın xatirəsini yad edib, məzarı önünə gül dəstələri düzüblər.
Tədbirdə Gəncə İcra Hakimiyyəti başçısı Aparatının İctimai-siyasi və humanitar məsələlər şöbəsinin baş məsləhətçisi Gülnar Rzayeva və Şəhər Birləşmiş Xəstəxanasının direktor müavini, ilkin səhiyyə xidmətlərinin rəhbəri Xalidə Sadıqova iştirak ediblər.
Burada “Ulu öndər Heydər Əliyevin əsas missiyası: Böyük Qayıdış”, “Gender məsələləri hüquqi müstəvidə: Mövcud vəziyyət, qarşıda duran məsələlər”, “Sosial - iqtisadi islahatların gender aspektləri. Formal və qeyri-formal məşğulluqda qadın təmsilçiliyi” və “Qadın hüquqlarının həyata keçirilməsində çağırışlar və qlobal tendensiyalar” mövzuları ətrafında müzakirələr aparılıb.
