Gəncə şəhər Kommunal Təsərrüfatı İstehsalat Birliyinin (MKTİB) Yaşıllaşdırma şöbəsinin Gülçülük sahəsində yerləşən müasir istixanalarda yaz güllərinin əkininə son hazırlıq işləri aparılır.
Gencexeber.az MKTİB-ə istinadən xəbər verir ki, təsərrüfatın ixtisaslı bağbanları tərəfindən toxumdan alınan şitillər kök verəndən sonra torf-torpaq qarışıqlı qablara köçürülərək əkilir.
Qış mövsümünü xüsusi aqrotexniki qulluq göstərilməklə istixanada keçirən güllər fevral ayının axırı - mart ayının əvvəlindən etibarən şəhərimizin müxtəlif ərazilərinə əkiləcək.
Artıq bu güllərin bəzi soyuğa davamlı növlərinin şəhər ərazisinə əkini aparılıb. Yaşıllaşdırma şöbəsinin gülçülük sahəsində çoxillik və mövsümü olan primula, viola, yay gülü, petunya, yurk qərənfili, geran, taqertis, kazanya, katarantus və digər müxtəlif növ gül bitkiləri becərilib. Hazırda təsərrüfatın istixanalarında 140.000 ədəddən çox gül şitili yetişdirilib. Bundan əlavə, Yaşıllaşdırma şöbəsinin Tingçilik təsərrüfatında tuya, leylandra, şam, xan çinarı və başqa ağac və kol növləri də yetişdirilir.
MKTİB-nin Yaşıllaşdırma şöbəsinin Gülçülük sahəsində əkilib beçərilən ağac tingləri, dekorativ kol bitkiləri, gül və çiçəklər Gəncəmizin estetik görünüşünə mövsümdən asılı olmayaraq zaman-zaman gözəllik qatır.
