Tovuzlu məmurun oğlunun hamilə arvadına işgəncə verdiyi iddia olunur.
Haqqin.az redaksiyasına zorakılığın qurbanı olan qadın müraciət edib. Məlum olub ki, ona qarşı vəhşilik edən şəxs əri, MSK sədri Məzahir Pənahovun oğlu Məhəmməd Pənahovdur. Maraqlıdır ki, hadisə ABŞ-də baş verib, Azərbaycana qaçan qadın canını güclə xilas edə bilib.
38 yaşlı qadın 2022-ci ilin 28 iyun tarixində Məhəmmədlə Bakıda ailə qurub. Sonra cütlük Los-Ancelesə köçüb. Heç bir yerdə işləməyən Pənahov 2 milyon 35 min dollara Los-Ancelesin Hollivud ulduzları yaşayan prestijli məhəlləsi - Bel-eyrdə dəbdəbəli malikanə alıb. Yeni ailənin pul cəhətdən də korluğu olmayıb. İmkanlı ata sayəsində Britaniya, Amerika və Dubay banklarında olan hesablardakı milyonlar sağa-sola xərclənib.
Məhəmməd köhnə vərdişlərinə qayıdana qədər hər şey yaxşı gedib. Amma sonradan o, yenidən spirtli içkilərə qurşanıb. Məsələn, Pənahov bir dəfəyə 26 şüşə pivə içə bilirdi. Sonra isə boş şüşələri hamilə qadına tərəf tolazlayırdı. İçkinin təsirindən yaranan halüsinasiyalar aqressiya törətdi və Məhəmməd qan, zorakılıq eşqinə düşdü. Qadın belə vəziyyətlərin birində qarnındakı körpəsini də itirib. Övlad itkisi ilə yanan qadın 17 ay dözərək sonradan Kaliforniyadakı villadan qaçmaq qərarına gəlir. Onun valideynləri dəfələrlə Kaliforniya polisinə müraciət etsələr də, qadın sadəcə Bakıya qaçmaqla xilas ola bilib. Amma Pənahov ona Bakıda da rahatlıq verməyib. Məhəmməd onu hədələyir, hər gün zəng edir və ölümlə qorxudurdu. Bundan bezən qadın boşanmaq üçün Binəqədi məhkəməsinə üz tutur. Amma uğursuzluq onu burada da təqib edir. Məhəmməd təkcə arvadını yox, onun vəkili, Azərbaycan Vəkillər Kollegiyasının üzvü Esmira Hüseynovanı da hədələməyə başlayıb. O, tələb edir ki, arvadı ABŞ-yə qayıtsın və əvvəlki həyatına davam etsin.
Biçarə qadın hazırda xilas olmaq və qurtulmaq üçün DİN-ə, ombudsmana və zorakılığa məruz qadınların yerləşdirildiyi sığınacağa müraciət edib.
Qeyd edək ki, Məzahir Məhəmməd oğlu Pənahov 13 mart 1951-ci ildə Tovuz rayonunun Qaraxanlı kəndində dünyaya gəlib. Fizika-riyaziyyat elmləri doktoru və professor, Azərbaycan Respublikası Mərkəzi Seçki Komissiyasının sədridir.
