Yaxınları bir neçə gün əvvəl vəfat edən Gəncə Dövlət Universitetinin baş müəllimi Kəmalə İsayevanın ölümündə həkim səhlənkarlığı olduğunu iddia edir.
Bu şikayətlə mərhumun həyat yoldaşı Aydın İsayev müraciət edib.
O bildirib ki, yoldaşını kəskin baş ağrısı və bədəninin uyuşması şikayətləri ilə Gəncədə yerləşən "Ozon Tibb Mərkəzi"nə aparıb.
"Yoldaşımı sözügedən xəstəxanada MRT müayinəsinə götürdülər. Bunun cavabına əsasən beyində iki törəmə olduğu deyildi. Daha sonra MRT nəticəsini Gəncə Mərkəzi Klinik Xəstəxanasına apararaq neyrocərrah Ramis Hüseynova müraciət etdik. O, 10 günlük sistem müalicəsi yazdı. Müalicənin ikinci günündən sistemlər vurulduqca durumu ağırlaşdı, əli və ayağı tamamilə tutuldu. Bundan sonra isə Bakıda Milli Onkologiya Mərkəzinə yönləndirildik. Təkrar MRT müayinəsindən sonra beyində törəmə yox, qansızma olduğu deyildi. Sonradan müdaxilə edilsə belə, vəfat etdi", - deyə şikayətçi bildirib.
Mərhumun həyat yoldaşı deyib ki, xərclənən pullara pis olmur, onu zamanla yenidən qazanar.
"Bəs, mənim canımı niyə aldılar? Gül kimi ailəmizi dağıtdılar, ailə tabloma xətt çəkdilər", - deyə A.İsayev bildirib.
Məsələ ilə bağlı "Ozon Tibb Mərkəzi"ndən bildirilib ki, tibb müəssisəsi həkimin verdiyi rəyə görə hüquqi məsuliyyət daşımır. Radioloq MRT görüntülərini qiymətləndirərkən rəyində beyində bədxassəli törəməyə bənzər görüntü olduğunu qeyd edib. Xəstənin ölüm səbəbi həmin törəmədir.
İttihamlarda adı keçən həkim Ramis Hüseynovla bağlı Gəncə Mərkəzi Klinik Xəstəxanasından bildiriblər ki, bununla bağlı cavab vermək istəmirlər.
Mənbə: qafqazinfo.аz
