Gəncədə yağan güclü yağış şəhərin bəzi ərazilərində ciddi fəsadlar törədib.
Gencexeber.az-ın məlumatına görə, intensiv yağıntı nəticəsində şəhərin Məhsəti qəsəbəsində bir neçə küçədən sel suları keçib. Qəsəbədə 10-a yaxın fərdi yaşayış evini su basıb. Yaşayış massivinin əsas küçələrindən biri isə sel sularının altında qalıb.
Leysan xarakterli yağışdan sonra yaranan sel qəsəbədə həm piyadaların, həm də avtomobillərin hərəkətində ciddi çətinliklər yaradıb. Sakinlərin sözlərinə görə, bu problem illərdir təkrarlanır.
Qəsəbə sakinləri qeyd ediblər ki, küçəyə dolan sel suları bir çox fərdi yaşayış evinə maddi zərər vurub. Bundan əlavə, yağışlı havalarda əraziyə nə təcili tibbi yardım avtomobili, nə də taksi daxil ola bilir. Sakinlərin sözlərinə görə, yağıntı o qədər güclü olur ki, küçə sanki çaya çevrilir.
Səhər saatlarında işə yollanan yaşlı qadın sözügedən vəziyyətlə üzləşərək narazılığını gizlədə bilməyib. O, yaranmış mənzərəyə etiraz edərək müxbirimizə "Belə vicdansızlıq olar?" sualı ünvanlayıb.
Məsələ ilə əlaqədar Gəncə Şəhər İcra Hakimiyyətinə ünvanladığımız sorğuya cavab olaraq bildirilib ki, artıq qurum tərəfindən Məhsəti qəsəbəsində intensiv yağışlar zamanı suların kənarlaşdırılması məqsədilə 400 metr uzunluğunda yeni drenaj xətləri çəkilib. Habelə 3 ədəd yağış barmaqlığı və nəzarət-baxış quyusu inşa edilib. Mövcud problem "Açıq Kommunal İnfrastruktur Proqramı II" layihəsinin icrasından sonra tam həllini tapacaq.
Sakinlər problemin tezliklə aradan qaldırılacağına ümid edirlər.
