Gəncə şəhəri Mahrasa bağı yaşayış massivində, 13 nömrəli binanın həyətində və ətrafında abadlıq işlərinin başa çatdırılmadığı iddia edilir.
Gencexeber.az-a daxil olan şikayətlərə görə, əraziyə tamet daşları döşənib. Lakin yeni yol ğrtüyü binanın arxasında olan giriş qapılarına qədər çatdırılmayıb. Nəticədə tamet döşənmiş hissə ilə sakinlərin evlərinə giriş olan daşlı-qumlu ərazi arasında təxminən 10–15 santimetrlik hündürlük fərqi yaranıb.
Sakinlərin sözlərinə görə, yağıntılı havalarda tametlə örtülmüş ərazidən axan yağış suları həmin hündürlük fərqinə görə evlərin giriş qapılarının qarşısında toplanır. Bu isə xüsusilə yağışlı günlərdə sakinlər üçün ciddi narahatlıq və çətinlik yaradır.
Vətəndaşlar ərazidə abadlıq işlərinin tam başa çatdırılmasını və evlərin girişlərinə qədər tamet döşənərək problemin aradan qaldırılmasını istəyirlər.
