Gəncədə layihə iştirakçıları təltif olunublar. Bu haqda 9 mart tarixində ADAU-ya istinadən məlumat veririk.
Gənclər Fondunun maliyyə dəstəyi, Gənclər Evi, Gənclərin İnkişaf və Karyera Mərkəzi təşkilatlarının tərəfdaşlığı və Azərbaycan Dövlət Aqrar Universitetinin (ADAU) təşkilatçılığı ilə keçirilən “Let’s play Mangala” tarixi manqala oyununun təbliği adlı layihə başa çatıb.
Layihənin açılışında çıxış edən ADAU-nun tədris işləri üzrə prorektoru Əhməd Məlikov, GİKM-in və Gənclər Evinin əməkdaşları Seymur Vəliyev və Şəhriyar Hacıyev gənclərin fəal olmalarının, proyektdə aktiv şəkildə iştirak etmələrinin gələcək karyeralarındakı vacibliyindən danışıblar. Təlimləri aparan ADAU-nun əməkdaşı Fərrux Rəhimli bildirib ki, məqsəd yeni nəslin intellektual və strateji oyunlara cəlb edilməsi, həmçinin milli-etnik dəyərlərimizə sahib, tarixi əhəmiyyəti olan oyunları gənclərə tanıtmaqdır.
Layihə rəhbəri Nigar Bayramova tərəfindən 2 günlük təlimlər ADAU-da, yarışlar isə Gənclər Evində təşkil olunub. Bağlanış mərasimində oyunun qalibi hədiyyələr, bütün iştirakçılar isə sertifikatla təltif ediliblər.
