Mingəçevir şəhərində 1994-cü il təvəllüdlü Mənsur sərxoş vəziyyətdə tanışı Səfərə (adlar şərtidir – red.) xəsarət yetirib.
Demokrat.аz xəbər verir ki, hadisə Mingəçevir şəhəri, Günəşli bağ massivində yerləşən "Samux" kafesinin yaxınlığında baş verib.
Mənsur orada tanışı Səfər və ortaq tanışları ilə söhbət edərkən qadın həmkəndlisinin əxlaqsız hərəkətləri barəsində danışan Səfərə məclislərinə uyğun olmayan söhbətlər etməsi ilə bağlı irad bildirib.
Bu zaman onların aralarında mübahisə yaranıb, sonra isə əlbəyaxa dalaşıblar. Mənsur Səfərin üzünə yumruq vurub.
Mənsurun barəsində Cinayət Məcəlləsinin 127.1-ci maddəsi ilə ittiham elan edilib.
İş üzrə ifadə verən Mənsur ona elan olunmuş ittiham üzrə özünü təqsirli bilib: "Hadisə günü saat 19 radələrində "Samux" kafesində söhbət zamanı Səfər spirtli içkinin təsirində olarkən yaşadığımız kəndin qadın sakinlərinin barəsində xoşagəlməz söhbətlər etməyə başladı. Mən də ona kəndin sakinləri haqqında bizim məclisimizdə söz danışmağın yersiz olmasını bildirdim. Aramızda mübahisə davam edərkən Səfər sağ qolumun işləməməsi, korsetdə olmasına görə onunla dalaşa bilməyəcəyimə əmin olaraq kəllə ilə məni vurmağa cəhd etdi. Həmin vaxt zərbədən yayındım, sol əlim ilə yumruqla Səfərin sifətindən bir dəfə vurdum".
Mingəçevir Şəhər Məhkəməsinin hökmü ilə Mənsur aylıq qazancından 10 faiz dövlət nəfinə pul tutulmaqla 1 il müddətə islah işləri cəzasına məhkum edilib.
