İsrailin Azərbaycandakı səfiri Ronen Kraus Gəncə, Göygöl və Mingəçevirə səfər edib.
Gencexeber.az məlumat verir ki, bu barədə İsrailin Azərbaycandakı səfirliyinin "X" sosial şəbəkəsindəki səhifəsində bildirilib.
Gəncəyə səfəri çərçivəsində Kraus şəhərin mədəni-tarixi xüsusiyyətləri ilə tanış olub - Ermənistanın dinc əhaliyə raket zərbələri endirməsi nəticəsində həlak olanların xatirəsini yad edərək Memorial kompleksi ziyarət edib, Gəncə Şərab Zavodunda və Nizami Gəncəvi məqbərəsində olub.
Bundan əlavə, səfir Göygöl rayonuna səfər edib, burada regionun alman irsi və yerli kənd təsərrüfatı müəssisələrinin işi ilə tanış olub.
Mingəçevirə səfəri zamanı səfir şəhər İcra Hakimiyyətinin başçısı İlham İsmayılovla görüş keçirib. Diplomata şəhərin sosial-iqtisadi inkişafı, sənaye və enerji potensialı barədə məlumat verilib, tərəflər gələcək əməkdaşlıq imkanlarını müzakirə ediblər.
Kraus həmçinin sənaye parkına baş çəkib, burada fəaliyyət göstərən müəssisələr, həyata keçirilən sənaye layihələri və şəhərin sənaye potensialı ilə tanış olub.
