Gəncədə avtoyuma məntəqələri ilə bağlı monitorinq aparılıb. Bu haqda 17 iyul tarixində Kəpəz televiziyasına istinadən məlumat veririk.
Baş Polis İdarəsi və onun tabeli qurumlarının əməkdaşları tərəfindən şəhər ərazisində çirkab suların axıdılması və məişət tullantılarının urnalardan kənara atılaraq ətraf mühitin çirkləndirilməsinin qarşısının alınması məqsədilə nəzarət tədbirləri keçirilib. Araşdırmalar zamanı bir neçə avtoyuma məntəqəsində avtomobillərin kimyəvi maddələrlə yuyulması nəticəsində çirkli suların yola axıdılması ilə gölməçələrin yaranması, ətrafa pis qoxu yayılaraq antisanitar vəziyyətin hökm sürməsi aşkarlanıb. Həmin məntəqələrin sahibləri ilə profilaktik söhbətlər aparılıb və barələrində qanunamüvafiq tədbir görülüb.
Bəzi şəxslər, xüsusilə qanunsuz olaraq küçə ticarəti ilə məşğul olanlar tərəfindən tullantıların urnalara deyil, ətraf əraziyə atıldığı da aşkarlanıb. Onlar barəsində protokol tərtib olunuraq məsuliyyətə cəlb olunublar.
Polis əməkdaşları tərəfindən cari ilin müvafiq dövrü ərzində ətraf mühitin çirkləndirilməsinin qarşısının alınması məqsədilə keçirilən monitorinq nəticəsində 700-ə yaxın şəxs barəsində inzibati protokol tərtib edilib. Qanunsuz olaraq küçə ticarəti ilə məşğul olan 1274 nəfər barəsində inzibati qərar qəbul olunub.
