Goranboy rayonunda dəm qazından zəhərlənmə ilə nəticələnən ölüm hadisəsi baş verib.
Gencexeber.az-ın məlumatına görə, hadisə rayonun Goran qəsəbəsində qeydə alınıb. 1995-ci il təvəllüdlü Gülşən Məmmədova atasının yaşadığı evin hamam otağında yaxınları tərəfindən huşsuz vəziyyətdə aşkarlanıb.
Qadın dərhal Goranboy Rayon Mərkəzi Xəstəxanasına çatdırılıb. Həkimlərin tibbi müdaxiləsinə baxmayaraq onun həyatını xilas etmək mümkün olmayıb.
Məlumata görə, 31 yaşlı qadın Bakı şəhərində yaşayıb və 8 Mart – Beynəlxalq Qadınlar Günü münasibətilə anasını təbrik etmək üçün Goranboya qonaq gəlib. O, iki azyaşlı övlad anası idi.
Faktla bağlı Goranboy rayon prokurorluğunda araşdırma aparılır.
