Sentyabrın 5-6-da Göygöl rayonunun Keşkü kəndində "III Moruq Festivalı" keçiriləcək.
Gencexeber.az məlumat verir ki, ziyarətçilərə moruq istehsalı ilə daha yaxından tanış olmaq imkanı yaradılacaq, yerli istehsalçılar tərəfindən təqdim olunan moruq növlərinin dequstasiyası və satışı, sənətkarların hazırladıqları əl işlərinin sərgi-satış yarmarkası təşkil ediləcək. Tədbir çərçivəsində qonaqlar üçün müxtəlif əyləncəli şou proqramların, xüsusi kampinq zonasının təşkili nümayişi nəzərdə tutulub.
Həftəsonu festivalın ərazisi müxtəlif interaktiv zonalara bölünəcək. Ziyarətçilər kənd təsərrüfatı məhsullarının sərgi-satış yarmarkasına, moruq təsərrüfatı guşəsinə baş çəkə biləcək, müxtəlif dequstasiya tədbirlərində iştirak edəcək, ustad dərslərini, o cümlədən moruqla rəsm çəkməyə dair ustad dərsi, açıq havada konsert proqramı, idmançıların nümunəvi çıxışlarını izləyə biləcəklər.
