Dövlət Komitəsi Gəncədə küçəyə atılan uşaqlarla bağlı açıqlama verib. Bu haqda 25 oktyabr tarixində Report-a istinadən məlumat veririk.
Ailə, Qadın və Uşaq Problemləri üzrə Dövlət Komitəsi azyaşlıların küçəyə atılması ilə bağlı araşdırmalara başlayıb. Qurum uşaqların nənəsi Mehriban Cəlilova ilə əlaqə saxlayıb. Qadın bildirib ki, azyaşlıların anası narkotik aludəçisidir və tüfeyli həyat tərzi keçirir. Nənə qəyyumluqdan imtina edərək, körpələri İcra Hakimiyyətinin (İH) qarşısına qoyub və oranı tərk edib.
Uşaqlar barədə məlumat İH tərəfindən Əmək və Əhalinin Sosial Müdafiəsi Nazirliyinin tabeliyində olan Sosial Xidmətlər Agentliyinin altsisteminə yerləşdirilib. Qurumun əməkdaşları yataqxanada yaşayan ailəyə baxış keçiriblər.
“Uşaqların vəziyyəti qiymətləndirilib, ananın narkotik aludəçisi olduğu təsdiqlənib. Hazırda azyaşlılar xəstəxanada müayinədən keçib, müvafiq müalicə alırlar, komissiya tərəfindən uşaqlara geyim və qida ilə bağlı lazımi dəstək göstərilir. Həftənin sonu 4 aylıq körpə Bakıda yerləşən körpələr evinə, 3 yaşlı uşaq isə Gəncə Uşaq Evinə yerləşdiriləcək", - deyə qurumdan bildirilib.
