Gəncənin Gülüstan qəsəbəsində yerləşən 4 nömrəli binanın sakinləri həyət ərazisində aparılan abadlıq işlərindən narazıdırlar.
Gencexeber.az binanın həyətində SSSR-i dövründə çəkilmiş asfalt örtüyünün uzun illər yararsız vəziyyətdə olması ilə bağlı ötən ay məlumat yayıb. Sakinlər həyətdə uşaqların asudə vaxtlarını keçirməsi üçün uyğun şərait olmamasından, ərazinin abadlaşdırılmasından şikayət ediblər.
Məsələ işıqlandırıldıqdan sonra binanın blok girişlərinə yeni bordürlər düzülüb, səkilərin asfaltlanmasına başlanılıb. Lakin görülən işlər sakinlərin narazılığına səbəb olub.
Onların sözlərinə görə, yeni düzülən bordürlər əyri qoyulub, çəkilən asfalt örtüyü isə nahamar vəziyyətdədir. Vətəndaşlar bu barədə iradlarını bildirdikdə isə onlara asfaltın üzərinə ayaqları ilə basaraq səthi hamarlamaları olduqları bildirilib.
Sakinlər aidiyyəti qurumlardan ərazidə aparılan işlərə nəzarət edilməsini, həyətin tam şəkildə abadlaşdırılmasını və işlərin şəhərin digər ərazilərində olduğu kimi müəyyən olunmuş standartlara uyğun görülməsini xahiş edirlər.
