Gəncə şəhərinin mərkəzi küçələrində yolların vəziyyəti sürücülərin narazılığına səbəb olur.
Gencexeber.az-a daxil olan şikayətlərə görə, problemlərdən biri Əziz Əliyev küçəsində müşahidə edilir. Burada kanalizasiya və digər kommunikasiya xətlərinin lükləri asfalt örtüyünün səthindən xeyli aşağıda yerləşir. Nəticədə avtomobillər hərəkət zamanı qəfil zərbələrə məruz qalır. Sürücülərin sözlərinə görə, bu vəziyyət avtomobillərin asqı sisteminin zədələnməsinə, təkər disklərinin əyilməsinə və şinlərin partlamasına səbəb olur.
Oxşar vəziyyət Heydər Əliyev prospekti 147 ünvanında da yaşanır. Şəhərin mərkəzi ərazisində yerləşən bu hissədə yol örtüyündə dərin çuxurlar əmələ gəlib.
Sürücülər bildirirlər ki, yolların bu vəziyyətdə olması avtomobillərin şəhər ərazisində icazə verilən sürətlə hərəkətini faktiki olaraq mümkünsüz edir. Hər iki küçədə yaranmış problemlərin aradan qaldırılması üçün aidiyyəti qurumların tədbir görməsi gözlənilir.
