Gəncədə yağışlı hava şəraitində bir sıra küçə və prospektlərdə su yığılması problemi yenidən gündəmə gəlib.
Gencexeber.az məlumat verir ki, son günlər yağan yağışlar şəhərin bəzi ərazilərində yolların su altında qalmasına səbəb olub. Bu isə həmin ərazilərdə həm avtomobillərin, həm də piyadaların hərəkətini çətinləşdirir.
Sakinlərin şikayət etdiyi ərazilər arasında Hacı Zeynalabdin Tağıyev küçəsi, Həsən bəy Zərdabi və Əli Məmmədov küçələrinin kəsişməsi (3 nömrəli şəhər poliklinikasının qarşısı), həmçinin Bəxtiyar Əliyev küçəsi və Nəriman Nərimanov prospekti yer alır.
Yağışlı hava zamanı bu ərazilərdə suyun yollarda toplanması sakinlərin narahatlığına səbəb olur.
Vətəndaşlar aidiyyəti qurumların sözügedən ərazilərdə problemin səbəblərini araşdırmasını, yağış sularının axıdılması sistemlərinin vəziyyətini yoxlamasını və problemin aradan qaldırılması üçün tədbirlər görməsini istəyirlər.
