Xəbər verdiyimiz kimi, Gəncə şəhər 34 saylı məktəbin 11-ci sinif şagirdi Elgün İbrahimov küçədə döyülərək qətlə yetirilib.
Aidiyyəti qurumlar tərəfindən atılan addımlarla yanaşı, sosial şəbəkələrdə də aksiya keçirilir.
Məsələ ilə bağlı Milli Məclisin Gəncədən olan deputatı Naqif Həmzəyev Gencexeber.az-a açıqlama verib.
Millət vəkili bildirib ki, bu hadisədən çox üzülürəm və kədərlənirəm:
“Çox təəssüf ki, belə amansız hadisə baş verib. Azərbaycan polisi və güc orqanları cinayəti törətmiş şəxs və ya şəxsləri mütləq tapacaq. Cinayətkarlar cəzasız qalmayacaq. Qanun qarşısında cavab verəcək. Elgünün ailəsinə və yaxınlarına başsağlığı verirəm. Allah səbir versin. Normal insan belə hadisə törədə bilməz. Tezliklə cinayətin səbəb və təfərrüatlarını öyrənəcəyimizə ümid edirik.
Cəmiyyətimizdə belə ağır və ağlasığmaz cinayətlərin baş verməməsi üçün daha çox işləməliyik. Təhsil müəssisələri, valideynlər, aidiyyəti qurumlar səfərbər olmalı, uşaqlarımızın, yeniyetmə gənclərin tərbiyəsinə daha çox yatırım etməlidir. Uşaqların ən həssas dönəmlərində onları qətiyyən tək qoymaq olmaz. Kaş bu hadisə baş verməzdi. Bir gəncin, bir ailənin ümidləri puç olmazdı. Heyif…”.
