Gəncənin bəzi ərazilərində təmizlik işləri mütəmadi olaraq aparılsa da, məişət və digər tullantılarla çirklənmə halları hələ də müşahidə olunur.
Gencexeber.az-a daxil olan çoxsaylı şikayətlərə görə, sözügedən çatışmazlıqlara 14 və 23 nömrəli tam orta məktəblərin qarşısında, 44 nömrəli ingilis dili təmayüllü məktəb-liseyin ətrafında, keçmiş Çəngəl-bıçaq zavodunun yaxınlığında salınmış yeni məhəllələrdə və İ.Kazımov küçəsində rast gəlinir.
Bundan başqa, Gəncə Cihazqayırma zavodunun yaxınlığında yerləşən yeni məhəllələrdə, Totanlı dairəsində – Təcili və Təxirəsalınmaz Tibbi Yardım Stansiyasının qarşısında, Ozan küçəsində məscidin qarşısında, Şah İsmayıl Xətai prospektində Qoşa Şir heykəlinin ətrafında da tullantıların yığılması ilə bağlı problemlər müşahidə edilir.
Samux rayonunun İnstitut qəsəbəsində uşaq bağçasının yaxınlığında, İmamzadə yolunda "Şahzadə" marketin qarşısında və Əttarlar küçəsi 44 ünvanında da oxşar vəziyyətin olduğu bildirilir.
Qeyd olunan ərazilərdə tullantıların vaxtında daşınması və təmizlik işlərinə nəzarətin gücləndirilməsi vacib məsələlərdən biri olaraq qalır. Sakinlər xüsusilə məktəb, uşaq bağçası və insanların sıx olduğu digər ərazilərdə antisanitar vəziyyətin aradan qaldırılmasını gözləyirlər.
